E-Sondag
Psalm 113 laat ons nadink oor dié wat in ellende verkeer, die behoeftiges wat letterlik op die ashope woon, leef en werk (113:7). Die hulpeloses lê letterlik in die stof, weg van enige rivier of water wat lewe gee. Hulle is nie die bron van ellende nie, maar staan aan die ontvangkant daarvan. Hier sien ons ’n ander kant van God raak: Jahwe, wat hoog verhewe is, kyk laag af (113:6) om die ellendiges uit die stof te laat opstaan. Daardeur word die rolle radikaal omgekeer: die behoeftiges sit saam met die vooraanstaandes (113:8). Ons kan aanneem dat hulle ook saam eet en saam skoon water drink.